27‏/01‏/2012

لا!!! لاستحقاق ايلول، واللي ضده كمان !!!

كلنا بنهتف باسم القدس!!!
هس
خيبنا القدس
بين استحقاق واستحقار للاستقرار او الاستعمار اتفلسفنا
تقلبنا على بعضنا وحكينا كملتنا وغنوتنا
لأ
مش عارف ليش ال "لأ" بس لأ
حباً بالاستقلال الشخصي وتعبيري عن نفسي بحكي
مش مهم اني مش فاهم المهم لساني يلعلع
صوتي يطلع وكلامي يسمّع اهل الارض طول وعرض ويوقّع
مش يوقّع عهده مع الوطن لأ
"انا بحب ال لأ زيكم لأني منكم"
وهيني شتيت عن الموضوع زيكم
بس بدي ارجع لعند ال "لأ"
مش يوقع عهده مع الوطن لأ
يوقع اي واحد ممكن يوقع حتى لو كان سندك
المهم اني وقعته
وبنفتخر في غنوتنا الي بتشعل غلوتنا
وتبخرنا وتكثفنا ورفضتنا السما ومطرتنا
ورجعنا نحكي لأ
والفكرة لسا براسي بس بدي اجرب ما احكيلها
لأ
بدي أطلعها
وهالمرة بخصصها للكل
الي مع والي ضد
ليش بتضرب في سيف الاستحقاق وليش بتضرب في الاستحقاق
ايش بتعرف عن دولة ايلول؟؟؟
شرّف قول؟
بس وحياة الي خلقك ما تقولي إني بفهمش
لاني بعرف اني جحش
بس تتفلسفش
وبس تفهم كلمة خلاصة أعطيني اياها
وحياة اللي رحمته بتفشق عن بطنك انتا واياه وبتبعد عندكم اني حسمعكم
بس فهمني ليش انتا مع وليش انتا ضد
عشان اعرف اوقف
احكي انا سياسي زيك وزيو
واحكي في الثم المليان
من عقل عطلان
في وجهك ووجهه
لأ
ما تنسوا اني منكم
فببلش حواري في اغنيتنا الشعبية
ولا اقولك؟؟؟
لأ
انا مخي اعطاني اياه الله أمانه
بدي اخليه مخبى في الخزانة
عشان احافظ عليه
وارجعه إليه
زي ما أعطاني اياه
لا مستعمل ولا مخدوش
لان طمعان برحمته
وسامع كلمته
بس يا ترا الواحد فيكم وزمرته
برضو بتحكولوا لأ؟
ولا عشنه بسامح
بتحكوا اشياء اكبر ما بعرفها ولا بخرفها ؟؟؟
اعطوني صورة واضحة
وخلوني أنسى ال "لأ" واعيش
وانا عارف أني مش نايم ورجلي في بطن اللي جنبي
وبرجع لصلب الموضوع
يلي عبّيت الدنيا بزاقة وانتا بتبرم فهمني
شو هو استحقاق أيلول؟
شرّف قول
ولأني منكم
بدي احفظ كلمتين اعرف العلع فيهم
وبوعدكم ما اكون
لا مع
ولا ضد
بس حسسني انك فاهم
وأنك معني تفهمني
ولا أريحك
انا بحكي لحالي عنك لأ

التوقيع: مواطن محنك
اي حنكه فالت

هناك تعليق واحد: